У Беларусі плануецца стварыць больш дасканалую сістэму кантролю за фінансавымі патокамі. Гэта прадугледжана папраўкамі ў закон аб мерах па прадухіленні легалізацыі даходаў, атрыманых злачынным шляхам, фінансавання тэрарыстычнай дзейнасці і распаўсюджвання зброі масавага паражэння, паведаміў карэспандэнту БЕЛТА член Пастаяннай камісіі па бюджэце і фінансах Палаты прадстаўнікоў Сяргей Занько.

Паводле слоў парламентарыя, у выпадку прыняцця законапраекта пры Савеце Міністраў сфарміруюць міжведамасны камітэт, які будзе кантраляваць выкарыстанне і размеркаванне фінансавых патокаў. "Ён будзе сабой уяўляць своеасаблівы каардынацыйны цэнтр. У яго плануецца ўключыць спецыялістаў розных міністэрстваў, ПВТ. Такім чынам, законапраект прадугледжвае стварэнне новай больш дасканалай сістэмы кантролю за фінансавымі патокамі", - адзначыў дэпутат.

Акрамя таго, праект закона накіраваны на ўрэгуляванне пытанняў ідэнтыфікацыі крыніц фінансавання. Рэалізацыя паправак, на думку распрацоўшчыкаў, дасць магчымасць павысіць эфектыўнасць мер па прадухіленні легалізацыі даходаў, атрыманых злачынным шляхам, створыць умовы для лепшай каардынацыі дзеянняў сілавых, банкаўскіх і ІТ-структур. У законапраекце ўлічана значная работа, якая праводзіцца ў Беларусі па развіцці лічбавай эканомікі і ўкараненні новых фінансавых інструментаў на рынку.

Плануецца, што законапраект будзе прадстаўлены ў першым чытанні на вясенняй сесіі Палаты прадстаўнікоў.

Навіны Беларусі (БЕЛТА)