Патрыятычны аўтапрабег «За адзіную Беларусь» пройдзе ў Віцебскай вобласці
Наваполацк стане зыходным пунктам аўтапрабегу "За адзіную Беларусь", адкуль 14 лістапада аўтакалоны накіруюцца па гарадах вобласці, паведаміў карэспандэнту БЕЛТА начальнік аддзела ідэалагічнай работы, культуры і па справах моладзі Наваполацкага гарвыканкама Мікалай Раманоўскі.
Стартаваць удзельнікі прабегу будуць з плошчы Будаўнікоў у Наваполацку. Далей яны праедуць у Верхнядзвінск, Мёры, Шаркаўшчыну, Глыбокае, Ветрына. Завершыцца аўтапрабег у Полацку каля помніка Вызваліцелям горада. Працягласць маршруту складзе больш за 240 км.
Правядзенне аўтапрабегу - ініцыятыва неабыякавых жыхароў гарадоў-суседзяў, Полацка і Наваполацка. З прапановай правесці яго звярнуліся прадстаўнікі моладзі, ветэранскіх арганізацый і грамадскага аб'яднання "Белая Русь". Усяго ў аўтапрабегу плануецца ўдзел каля 100 чалавек.
Для рэгіёна гэта дэбютнае мерапрыемства, і яго праграма будзе лаканічнай. Удзельнікі прабегу наведаюць месцы пахавання - брацкія магілы загінулых воінаў Вялікай Айчыннай вайны. Да помнікаў ускладуць кветкі. Па ўсім шляху руху ўдзельнікі аўтапоезда будуць сустракацца з лідарамі грамадскіх аб'яднанняў райцэнтраў і населеных пунктаў, дзе будуць рабіць прыпынкі. Прадстаўнікі раённых арганізацый ГА "Белая Русь", ГА "БРСМ", прафсаюзаў і ветэранскіх арганізацый маюць намер далучыцца да аўтапоезда.
"Можна сказаць, што гэта народны аўтапрабег, які будзе арганізаваны дзякуючы грамадзянскай ініцыятыве, - адзначыў Мікалай Раманоўскі. - Для ўдзельнікаў гэта магчымасць наведаць выдатныя мясціны раёнаў нашай вобласці, убачыць прыгажосць роднага краю, змяніць звыклы маршрут "дом - работа" і сустрэцца з аднадумцамі".