Інфармацыйна-адукацыйны праект «Школа актыўнага грамадзяніна» упэўнена крочыць па Лепельшчыне. Установы адукацыі наведваюць прадстаўнікі розных структур, якія размаўляюць з дзецьмі на важныя тэмы. Так, напрыклад, з падлеткамі Старалядзенскай яслі-сад - базавай школы сустрэўся старшыня раённага Савета дэпутатаў Ігар Урбан. Удзельнікі дыялогавай пляцоўкі на гэты раз гутарылі на тэму «Беларусь і Расiя: гісторыя станаўлення і развіцця Саюзнай дзяржавы».
- 2 красавіка Рэспубліка Беларусь і Расійская Федэрацыя адзначаюць Дзень яднання народаў Беларусі і Расіі. Гэты выбар абгрунтаваны гістарычна і сацыякультурна, - пачаў свой выступ госць.
На працягу стагоддзяў беларускі і расійскі народы неаднаразова даказвалі сваё імкненне быць разам. Не выпадкова ў ліку чатырох заснавальнікаў Савецкага Саюза ў 1922 годзе былі і Расія, і Беларусь. Яшчэ больш аб'яднала і з'яднала нашы народы сумесная барацьба з фашызмам падчас Другой сусветнай вайны.
Ігар Генадзевіч у сваім выступе адзначыў, што і сёння на тэрыторыі Расіі засталіся гарады і пасёлкі, якія можна назваць беларускімі не толькі таму, што яны будаваліся сіламі беларускіх будаўнікоў, але і таму, што значную частку іх насельніцтва складаюць этнічныя беларусы. У сваю чаргу Беларусь стала родным домам для многіх сотняў тысяч рускіх.
За гады існавання Саюзнай дзяржавы былі рэалізаваны і працягваюць ажыццяўляцца дзясяткі праграм. У першую чаргу, яны звязаны з навукай, абаронай, бяспекай і сацыяльнай сферай. Ёсць таксама распрацоўкі ў галіне энергетыкі, эканомікі, сельскай гаспадаркі і, вядома, палітыкі. Ключавым праектам унутры Саюзнай дзяржавы надаецца асаблівая ўвага.
Так, напрыклад, маладзёжныя праграмы Саюзнай дзяржавы ўключаюць у сябе мноства мерапрыемстваў, што фінансуюцца з саюзнага бюджэту: Міжнародная алімпіяда школьнікаў Саюзнай дзяржавы па рускай мове і літаратуры «Расія і Беларусь: гістарычная і духоўная супольнасць»; турысцкі злёт навучэнцаў Саюзнай дзяржавы; злёт юных эколагаў Беларусі і Расіі «Экалогія без межаў» і многія іншыя.
Не абышлі ўвагай у гутарцы і наш раён, у якога склаліся доўгатэрміновыя пабрацімскія і партнёрскія адносіны з Мелякескiм раёнам Ульянаўскай вобласці, Кiняшэмскiм раёнам Іванаўскай вобласці, Бегавым раёнам горада Масквы. Наладжана цеснае супрацоўніцтва з Пскоўскай і іншымі абласцямі.
Між Лепельшчынай і гэтымі рэгіёнамі ўстаноўлены пастаянныя дружалюбныя сувязі ў розных сферах. У першую чаргу ўзаемадзеянне выражаецца ў культурным абмене, у абмене дэлегацыямі, ва узаемадапамозе і падтрымцы.
Таксама было адзначана, што ў КУП «ДРАЦ «Жамчужына», які размешчаны ў маляўнічым месцы, адпачываюць і аздараўляюцца дзеці з Расіі.