У Лепелі адбылася выязная лятучка галоўных рэдактараў сродкаў масавай інфармацыі Віцебскай вобласці «Стан і развіццё сучасных рэгіянальных СМІ ва умовах трансфармаціі медыясферы», арганізаваная галоўным упраўленнем ідэалагічнай работы і па справах моладзі Віцебскага аблвыканкама, Лепельскім райвыканкамам і ўстановай «Рэдакцыя газеты «Лепельскі край».
Удзельнікаў мерапрыемства павітаў старшыня райвыканкама Міхаіл Кісялевіч, які таксама распавёў пра наш лепельскі край, яго славутасцi і дасягненнi.

На працягу некалькіх гадзін былі абмеркаваны праблемы раённых выданняў і пастаўлены задачы для далейшай плённай працы рэгіянальных СМІ.
Апроч працоўнай часткі госці наведалі Цэнтр сацыяльна-працоўнай, сацыяльна-бытавой і фізічнай рэабілітацыі інвалідаў і высадзілі дрэвы «Алеі адзінства» ў Храма Божага Нараджэння.

Акрамя надзённых пытанняў у кіраўнікоў друкаваных выданняў была магчымасць пагутарыць у нефармальнай абстаноўцы, абмяняцца карыснай інфармацыяй.

У працы выязной лятучкі прыняла ўдзел творчая група ЗАТ «Сталічнае тэлебачанне»: Кірыл Казакоў, Рыгор Азаронак, Юлія Арцюх, Алёна Радоўская.

Госці са сталіцы звярнулі асаблівую ўвагу на аўтарскую журналістыку. У сучасным свеце мы атрымліваем інфармацыю з розных крыніц, таму толькі асабістае меркаванне журналіста становіцца запатрабаваным медыяпрадуктам.

Таксама прафесійныя журналісты з Мінска прапанавалі рэгіянальным аўтарам глыбока асэнсоўваць падзеі, што адбываюцца і выкарыстоўваць у рабоце сучасныя мэсэнджары.

Як адзначылі прадстаўнікі ЗАТ «Сталічнае тэлебачанне», кожную навіну яны дробняць і закідваюць ва ўсе сацыяльныя сеткі і мэсэнджэры. Так, напрыклад, у нядзелю ў іх выходзіць перадача «Тыдзень», якая рыхтуецца загадзя інтэрнэт-службай. Інтэрв'ю раскладваецца на часткі і прасоўваецца праз усе магчымыя сеткі. Не варта даваць доўгія інтэрв'ю ці рэпартажы, яны не карыстаюцца папулярнасцю.

У кожнага з творчай групы ёсць свае каналы. Так, напрыклад, у Рыгора Азаронка - «Азаронак. СТВ», дзе ён таксама прасоўвае іншых аўтараў «Сталічнага тэлебачання». А ўлічваючы тое, што Рыгор стаў вельмі вядомай асобай за гэты год і ў яго больш за 5 тысяч падпісчыкаў на Telegram-канале, туды закідваюцца матэрыялы, якія хацелася б данесці да шматлікай публікі.

- Чытаючы розныя каналы, вы павінны разумець, што па той бок не хлопчык Сцёпа або Антон. Там сядзяць спецыялісты з спецслужбаў розных напрамкаў. Мы, журналісты, закліканы супрацьстаяць вельмі сур'ёзным людзям. Іх задача - знішчыць краіну і разрабаваць. Наша задача - не даць гэтага зрабіць, - адзначыў Рыгор Азаронак.

- Мы павінны рэагаваць на кожную крытычную заметку. Напрыклад, нехта ў сетках паказаў фота з дрэннай дарогай або тратуарам, недобраўпарадкаванай дзіцячай пляцоўкай, мы павінны паказаць, што зроблена добрага і у разы больш, - дадала Алена Радоўская.

Юлія Арцюх:
 - Я лічу, што ў рэгіёны важна везці аўтарскую журналістыку, каб было кампетэнтнае меркаванне аўтара, каб ён быў чытаем, каб прыслухоўваліся да яго. Гэта неабходны, на мой погляд, ва ўсёй гэтай інфармацыйнай вайне кампанент.

Падрабязна