На званне лепшага выканаўцы прэтэндавалі 6 салістаў-вакалістаў і 3 вакальных ансамбля.
Творчае спаборніцтва маладых
выканаўцаў - конкурс патрыятычнай песні «Песні юнацтва нашых бацькоў-2023» з
кожным годам становіцца больш папулярным у маладзёжным асяроддзі.
Для ўдзелу запрашаліся выканаўцы ва ўзросце ад 16 да 35 гадоў у катэгорыі саліст або ансамбль, якія павінны былі падрыхтаваць 2 кампазіцыі, створаныя ў перыяд з 1970 года да 2000 года.
Першая песня – «Песні душы маёй» прысвечана роднай Беларусі, родным мясцінам і людзям, пра каханне і мары, другая - гэта савецкі, беларускі ці замежны хіт. Агульны хранаметраж песень не павінен перавышаць 8 хвілін.
Арганізатары творчага конкурсу лічаць асноўнай мэтай дадзенага мерапрыемства падтрымку таленавітых маладых выканаўцаў, павышэнне ўзроўню выканальніцкага майстэрства, патрыятычнага і эстэтычнага выхавання падрастаючага пакалення на лепшых узорах песеннага жанру мінулых гадоў.
У гэтым годзе ўдзельнічалі ў конкурсе як новыя маладыя галасы, так і ўжо вопытныя выканаўцы. Такім чынам, на галоўнай сцэне раёна сабралася таленавітая, я б сказала, «залатая» моладзь Лепельшчыны.
Першым выступаць заўсёды вельмі хвалююча. Гэта місія выпала Вользе Вараб'ёвай, якая прадстаўляла Бароўскую сярэднюю школу імя Г. К. Жукава Лепельскага раёна. Яна і задала тон мерапрыемству, выканаўшы песню «Малітва за Беларусь» на словы Янкі Купалы. Пасля таго, як музыка сціхла, па апладысментах у зале можна было зразумець, што барацьба чакаецца сярод удзельнікаў сур'ёзная, падрыхтаваліся ўсё грунтоўна і прыкладуць максімальныя намаганні, каб перамагчы.
Чыстым голасам і прыгожым тэмбрам пакарыла журы Дар'я Чумак з аграрна-тэхнічнага каледжа, выканаўшы ўсім вядомую кампазіцыю «Як табе служыцца».
Не менш актыўна сустракалі гледачы і наступнага выканаўцу з гэтай жа ўстановы адукацыі - Максіма Васілёнка. «Дах дома твайго» - песню падпявалі ў зале і школьнікі, і дарослыя, якія яе чулі яшчэ ў дзяцінстве.
Душэўным выкананнем знайшла шлях да сэрца гледачоў і суддзяў Марыя Ермалаева з гімназіі ім. І. М. Ярашова горада Лепеля з песняй «Велізарнае неба».
Алег Назараў з 19-й асобнай гвардзейскай механізаванай брыгады, якая дыслакуецца ў вёсцы Заслонава, не пакінуў нікога абыякавым, праспяваўшы ўсім знаёмыя словы папулярнага шлягера «Песня застаецца з чалавекам», напісанага ў 1960-х гадах кампазітарам Аркадзем Астроўскім і паэтам Львом Ашаніным. У свой час кампазіцыя хутка спадабалася слухачам і стала гімнам савецкай эстрады і застаўкай тэлевізійнага музычнага конкурсу «Песня года».
Крысціна Дорахава, якая прадстаўляла Лепельскую дзіцячую школу мастацтваў, уразіла ўсіх прафесійным выкананнем «Жураўлі на Палессе ляцяць» і закранула тонкія струны душы гледача. І гэта не дзіўна, бо яна ўжо не пачатковец у такіх конкурсах.
Тое ж самае можна сказаць і пра дуэт Вольгі Дзмітрычэнка і Аляксандры Мышко, прадстаўнікоў філіяла «Заслонаўская ДШМ». Шчырасць, з якой дзяўчаты выканалі свой нумар «Песня аб роднай зямлі», не пакінула абыякавым прысутных у зале.
Яркім аказалася і выступленне трыо Алены Валевіч, Ксеніі Ельчынай і Кацярыны Юсупавай, выкладчыкаў сярэдняй школы №1 горада Лепеля. Разам з імі песню «Хата бацькоў» падпявала ўся зала.
«Там, дзе клён шуміць» -- такая кампазіцыя была ў вакальна-інструментальнай групы «Гвардыя» з 19-й асобнай гвардзейскай механізаванай брыгады, якая дыслакуецца ў вёсцы Заслонава. Прыемна было назіраць, як маладое пакаленне па іншы бок сцэны спявала разам з артыстамі. Калі пацікавілася, адкуль ведаюць словы, адказалі, што вывучылі падчас прагляду серыяла «Сваты».
На працягу ўсяго першага этапу ў зале гучалі акорды вядомых кампазіцый, і госці не стрымліваючы сваіх эмоцый, падпявалі артыстам, а затым гучна апладзіравалі.
Пра песні другога этапу можна сказаць, што яны без часу. Гэта шлягеры розных перыядаў, якія адлюстроўваюць важныя з'явы і падзеі ў жыцці чалавека.
«Новы герой», «Куды сыходзіць дзяцінства», «Яблыкі на снезе», «Усё пройдзе», «Рамантыкі» - гэтыя і іншыя шлягеры былі выкананы канкурсантамі ў наступным аддзяленні. Трэба сказаць, у цяперашні час сучасная моладзь усё часцей вяртаецца да хітоў мінулых гадоў. Праўда, у сучаснай аранжыроўцы яны атрымліваюць новае гучанне, але сэнс у іх застаецца той самы - глыбокі.
Конкурсныя нумары ацэньвала кампетэнтнае журы на чале з начальнікам аддзела ідэалагічнай работы, культуры і па справах моладзі Аленай Барадзейка па такіх крытэрыях, як адпаведнасць праграмы ўзросту выканаўцы, тэматыцы конкурсу, узровень выканальніцкага майстэрства і падрыхтоўкі, вакальныя даныя, артыстычнасць, сцэнічная культура.
Праслухаўшы ўсіх, суддзям было вельмі складана вызначыць лепшага, бо ўсе выступы былі яркімі, запамінальнымі і кранальнымі.
Перш чым узнагародзіць пераможцам, Алена Іванаўна падзякавала лепельчанам за старанне, душэўнае выкананне і актыўны ўдзел. Яна падкрэсліла, што конкурс стаў яскравай падзеяй, якая прайшла пад эгідай Года міру і стварэння. Акрамя таго, такія мерапрыемствы паказваюць, наколькі моладзь беражліва ставіцца да гісторыі, культуры і творчых традыцый свайго народа.
Старшыня журы адзначыла, што ўзровень фестывалю з кожным годам становіцца вышэй. Прыемна і тое, што праводзіцца вялікая праца з таленавітай моладдзю. Пра гэта сведчаць сённяшнія нумары. Галоўная мэта, якую ставіць перад сабой конкурс, - заахвочваць і прапагандаваць таленты, — дасягнута.
У выніку Гран-пры сярод салістаў-вакалістаў атрымала Крысціна Дорахава, 1 месца — Алег Назараў, на 2-й прыступцы пастамента апынулася Дар'я Чумак і на 3-й - Максім Васілёнак.
Сярод вакальных ансамбляў журы першае месца прысудзіла двум калектывам - дуэту Аляксандры Мышко і Вольгі Дзмітрычэнка і вакальна-інструментальнай групе «Гвардыя». Усе прызёры атрымалі падарункі ад арганізатара конкурсу - аддзела ідэалагічнай работы, культуры і па справах моладзі.
Як сказалі фіналісты, выбар кампазіцый у кожнага быў не выпадковым, бо менавіта ў іх яны змаглі раскрыць свае вакальныя дадзеныя, падмацаваўшы іх яркай харызмай.
У завяршэннi хочацца падзякаваць арганізатарам конкурсу - аддзелу ідэалагічнай работы, культуры і па справах моладзі райвыканкама, работнікам раённага Дома культуры за падрыхтоўку мерапрыемства і ўсім удзельнікам за падораны настрой і зарад станоўчых эмоцый на доўгі час.
Наталля Храпавіцкая.
https://lepel-kraj.by/novosti/god-mira-i-sozidaniya/opredeleny-pobediteli-konkursa-pesni-yunosti-nashih-otcov-02-02-2023