Аб спрошчаным парадку будаўніцтва і рэканструкцыі распавёў намеснік старшыні Лепельскага райвыканкама Сяргей Быстрыцкі
За апошнія два гады заканадаўства ў сферы будаўніцтва зведала значныя змены. Быў прыняты шэраг нарматыўна-прававых дакументаў, накіраваных на скарачэнне папяровай цяганіны пры ўзвядзенні аднакватэрных жылых дамоў і нежылых капітальных пабудоў пятага класа складанасці на прысядзібных зямельных участках.
Падрабязна пра гэта нам распавёў
намеснік старшыні райвыканкама Сяргей Быстрыцкі, які курыруе
пытанні будаўніцтва і жыллёва-камунальнай гаспадаркі.
-- Як вядома, з 15 снежня 2022 года ўступіў у сілу Указ Прэзідэнта
Рэспублікі Беларусь №202 «Аб спрошчаным парадку ўзвядзення і рэканструкцыі
аб'ектаў будаўніцтва».
Нормы гэтага Указа ўстанаўліваюць новыя магчымасці будаўніцтва і
рэканструкцыі аднакватэрных жылых дамоў і нежылых капітальных пабудоў у
залежнасці ад месца знаходжання зямельнага ўчастка, - пачаў нашу гутарку Сяргей
Міхайлавіч.
- Як зараз можна будаваць на вёсцы?
- Для ўзвядзення або рэканструкцыі аднакватэрных жылых дамоў і гаспадарчых пабудоў пятага класа складанасці ў сельскіх населеных пунктах дастаткова мець дакумент, які сведчыць права на зямельны ўчастак. -
А якія аб'екты адносяцца да аб'екта пятага класа складанасці?
- Пералік аб'ектаў, якія адносяцца да 5-га класа складанасці, змяшчаецца ў будаўнічых нормах 3.02.07-2020 «Аб'екты будаўніцтва. Класіфікацыя». Да асноўных характарыстык аб'ектаў 5-га класа складанасці, якія трапляюць пад дзеянне Указа № 202, адносяцца аднакватэрныя жылыя дамы вышынёй да 7 метраў і архітэктурнай вышынёй да 12 метраў. Таксама сюды ўваходзяць гаспадарчыя пабудовы на прысядзібных участках, калі не перавышаюцца наступныя крытэры: агульная плошча - 200 метраў квадратных, вышыня - 7 метраў, архітэктурная вышыня - 12 метраў.
-- Ад якіх працэдур зараз можна адмовіцца, пасля ўступлення ў сілу Указа № 202?
- Указам прадугледжана, што аб'екты можна пабудаваць без атрымання дазволаў і распрацоўкі праектнай дакументацыі.
-- Ці можна ўвесці ў эксплуатацыю жылы дом па Указу №202 пасля рэканструкцыі, калі яго рэканструкцыя пачата больш за 6 гадоў таму?
-- Дзеянне Указа распаўсюджваецца на аб'екты, пачатыя будаўніцтвам пасля ўступлення яго ў сілу. Такім чынам, яго дзеянне не распаўсюджваецца на жылыя дамы, пачатыя будаўніцтвам на падставе раней выдадзенай дазвольнай дакументацыi.
-- Ці трапляюць пад дзеянне Указа зямельныя ўчасткі, набытыя з аўкцыёну да ўступлення ў сілу?
- Не. Будаўніцтва аб'ектаў на зямельных участках, набытых на аўкцыёнах да ўступлення ў дзеянне Указа № 202, ажыццяўляецца ў адпаведнасці з умовамі праведзенага аўкцыёну.
-- Існуюць нормы па размяшчэнні аднакватэрнага жылога дома і гаспадарчых пабудоў на прысядзібным зямельным участку?
-- Неабходна памятаць, што адлегласць ад межаў суседняга (сумежнага) зямельнага ўчастка да жылога дома павінна складаць не менш за 3 метры, нежылых капітальных пабудоў - не менш за 2 метры. У кожным індывідуальным выпадку лепш звярнуцца па кансультацыю да спецыялістаў аддзела архітэктуры і будаўніцтва, жыллёва-камунальнай гаспадаркі райвыканкама.
-- Ці ўплываюць неяк нормы Указа на тэрміны, у якія зямельны ўчастак павінен быць асвоены?
- Не. Указ № 202 змяшчае толькі нормы, якія ўстанаўліваюць спрошчаны парадак будаўніцтва жылых дамоў, і не змяшчае нормы аб тэрмінах іх будаўніцтва. Тэрміны будаўніцтва жылых дамоў вызначаюцца іншымі нарматыўна-прававымі актамі, дазвольнай дакументацыяй.
-- Якія яшчэ нарматыўна-прававыя акты, прынятыя ў апошні час, дапамогуць грамадзянам для рэгістрацыі ўзведзеных пабудоў?
-- Указ Прэзідэнта Рэспублікі Беларусь ад 25 ліпеня 2022 года №253 «Аб спрошчаным парадку прыёмкі ў эксплуатацыю аб'ектаў будаўніцтва», які ўступіў у сілу з 1 верасня 2023 года. Дадзены нарматыўна-прававы акт дае магчымасць грамадзянам, зарэгістраваць збудаваныя імі аб'екты нерухомасці па рашэнні мясцовага выканаўчага і распарадчага органа без наяўнасці дазвольнай дакументацыі на іх будаўніцтва.
Указ №253 распаўсюджваецца на аб'екты будаўніцтва, узведзеныя (рэканструяваныя) грамадзянамі на зямельных участках, правы на якія ў іх узніклі да 1 верасня 2022 года і прызначаныя для будаўніцтва і (або) абслугоўвання аднакватэрных жылых дамоў.
- Указ № 253 можна прымяняць да ўсіх аб'ектаў?
- Не. Толькі ў дачыненні да аб'ектаў пятага класа складанасці і аб'ектаў, якія адпавядаюць будаўнічым нормам і горадабудаўнічай дакументацыі ў частцы захавання нармаваных разрываў ад межаў зямельнага ўчастка да збудаваных (рэканструяваных) аб'ектаў. Указ № 253 носіць часовы характар, і дзейнічае да 1 студзеня 2025 года.
У перыяд дзеяння будаўнічай амністыі ў дачыненні да грамадзян, якія ўзвялі жылы дом або гаспадарчыя пабудовы без дазвольнай і праектнай дакументацыі меры адміністрацыйнай адказнасці прымяняцца не будуць.
-- Ці звяртаюцца грамадзяне ў Лепельскі раённы выканаўчы камітэт за ўводам у эксплуатацыю пабудаваных пабудоў без дазвольнай і праектнай дакументацыі у рамках Указа №253?
-- За перыяд студзень-лістапад бягучага года ў райвыканкам звярнулася больш за 150 грамадзян.
Больш падрабязную інфармацыю можна атрымаць у аддзеле архітэктуры і будаўніцтва, жыллёва-камунальнай гаспадаркі Лепельскага райвыканкама.
Гаварыла Наталля Храпавіцкая. Газета «Лепельскі край»