Бачым, чуем, адчуваем! У Домжарыцкай бібліятэцы прайшоў пазнавальны ўрок
Наша жыццё не было б поўным, не май мы магчымасці
атрымліваць асалоду ад спеваў птушак і выдатнай музыкi, удыхаць водары кветак, першай
вясновай лістоты і хваёвага лесу. Без сузірання прыгажосцяў навакольнага свету,
твораў мастацтва і атрымання задавальнення ад ужывання ў ежу любiмых
страў. А колькі радасці і шчасця, адчування любовi і клопату, дастаўляюць дзецям і
дарослым звычайныя абдымкі! Менавіта дзякуючы нашым органам пачуццяў наша жыццё яркае, разнастайнае і
эмацыйнае.
У рамках Сусветнага дня здароўя ў Домжарыцкай сельскай бібліятэцы прайшоў
інфармацыйна-пазнавальны ўрок "Бачым, чуем, адчуваем: органы пачуццяў
чалавека", на які былі запрошаны навучэнцы 1, 2 і 4 класаў
Домжарыцкай школы з класнымі кіраўнікамі. Падчас мерапрыемства хлопцы даведаліся шмат новага пра арганізм чалавека. З дапамогай
эксперыментаў (з завязанымі вачамі, навобмацак, па гуках і г.д.) праверылі,
наколькі добра ў іх развіты пяць органаў пачуццяў: нюх, дотык, зрок,
слых і смак. Праверылі працу кожнага органа па асобку, пасля чаго зрабілі
выснову, што для атрымання найбольш поўнай і вычарпальнай інфармацыі аб
навакольным свеце, неабходна іх праца ў сукупнасці, бо пры парушэнні
функцыянавання якога-небудзь органа чалавек становіцца ўразлівым і часам
падвяргаецца вялікай небяспецы. Таксама абмеркавалі правілы, якія трэба выконваць кожнаму, для таго, каб нашы
органы пачуццяў былі здаровымі.
З вялікім задавальненнем дзеці выканалі зарадку для вачэй, схему якой атрымалі
ад бібліятэкара і размяліся падчас фізкультхвілінкі.
У канцы мерапрыемства хлопцы даведаліся, як з дапамогай рэльефна-кропкавага тактыльнага
шрыфта Брайля чытаюць людзі, пазбаўленыя зроку, і паспрабавалі самі прачытаць
прыказкі, запісаныя дадзеным шрыфтам.
Таццяна Смаляная, бібліятэкар Домжарыцкай сельскай бібліятэкі.