Напярэдадні Дня маці мы сустрэліся з Аленай Бельскай, начальнікам аддзела загса Лепельскага райвыканкама, і даведаліся пазнавальныя лічбы статыстыкі. Нараджальнасць, сярэдні ўзрост жанчын-маці, самыя папулярныя імёны для нованароджаных - цікавыя факты прыведзены ніжэй.

Як распавяла Алена Канстанцінаўна, за 9 месяцаў 2023 года ў Лепельскім раёне на свет з'явіўся 151 малыш - 73 хлопчыкі і 78 дзяўчынак. Гэта на 4 малыша больш, чым за аналагічны леташні перыяд.

Сярэдні ўзрост маладых мам - 28 гадоў, тат - 30. Самай маладой мамай стала 17-гадовая дзяўчына, а самым маладым бацькам - 19-гадовы хлопец. А самымі «вопытнымі» сталі дзве мамы ва ўзросце 42 і 44 гадоў і двое тат ва ўзросце 51 і 57 гадоў.

Большасць дзетак - 134 - нарадзіліся ў поўных сем'ях, а 17 малых з'явіліся на свет у жанчын, якія будуць выхоўваць дзяцей без бацькоў. 

Прыводзячы лічбы статыстыкі, начальнік аддзела загса адзначыла прыемную тэндэнцыю - колькасць дзяцей у сем'ях Лепельскага раёна павялічылася. Большасць (102 са 151 нованароджаных) не з'яўляюцца першынцамі. Так, 60 малых з'явіліся ў сем'ях другімі, 31 - трэцімі, сямёра малых нарадзіліся чацвёртымі і чацвёра - пятымі!

Самымі папулярнымі імёнамі для дзяўчынак у 2023 годзе сталі Сафія, Васіліса, Кіра і Стэфанія. Для хлопчыкаў - Максім, Міхаіл і Уладзіслаў.

Дзяўчатак таксама называлі такімі экзатычнымі для нас імёнамі, як Франчэска, Далія, Сабіна, а імя Паліна ўжо перастала быць суперпапулярным. 

Яна МІСНІК, газета «Лепельскі край»