На працягу 3 дзён убачыць дасягненні беларускай навукі могуць жыхары Віцебскай вобласці на футбольным манежы. Дэлегацыя з Лепельскага раёна таксама адправіліся паглядзець найноўшыя распрацоўкі і перадавыя тэхналогіі розных сфер жыццядзейнасці, актуальныя дасягненні навукі і тэхнікі.
Хочацца адзначыць, што з першых хвілін яе працы чарга з ахвочых убачыць унікальныя і цікавыя распрацоўкі не спынялася. Паглядзець на перадавыя распрацоўкі беларускіх вучоных жыхары Віцебшчыны прыйшлі сем'ямі, працоўнымі і навучальнымі калектывамі, прыехалі з усіх куткоў рэгіёна. Самае цікавае, што былі і тыя, хто ўжо пабываў на выставе ў Мiнску, але вырашыў яшчэ раз убачыць цікавыя праекты.
У Мiнску экспазіцыя была арганізавана яшчэ напярэдадні Дня беларускай навукі. Прэзідэнт падкрэсліў, што з ёю павінны азнаёміцца і ў рэгіёнах краіны, і асабліва моладзь.
Для зручнасці наведвальнікаў выставу падзялілі на тэматычныя блокі: штучны інтэлект, IT-тэхналогіі, робататэхніка, інавацыйнае прыборабудаванне, электратранспарт, абароназдольнасць і ваенная навука. Таксама шырока прадстаўлены экалогія, прыродакарыстанне, біятэхналогіі, фармацыя, ахова здароўя, медыцына, аграпрамысловы комплекс, харчаванне, прастора маладзёжных ініцыятыў. Значная частка з гэтых распрацовак ужо запушчана ў рэальную вытворчасць і паспяхова рэалізуецца. Важна, што сувязь навукі і вытворчасці вельмі цесная. У прынцыпе, так і мусіць быць. У будучыні распрацоўкі нашых навукоўцаў будуць прыдатныя ва ўсіх галінах эканомікі.
Віцебская вобласць прадставіла на выставе «Беларусь інтэлектуальная» звыш 40 сваіх праектаў ад больш за 10 прадпрыемстваў і арганізацый. Так, свае дасягненні паказалі Віцебскі дзяржаўны медыцынскі ўніверсітэт і «Віцязь», Віцебскі завод электравымяральных прыбораў, навукова-вытворчая фірма «Дыпаль», «Рэсурскантроль», «Е-Паўэр», «Фабрыка «Спектр упакоўкі», «Белкаролін», «ВІК - здароўе жывёл», кандытарская фабрыка «Віцьба», БРСМ і іншыя. Прэзентацыя дасягненняў Віцебшчыны выдатная ідэя арганізатараў, бо часам людзі не ведаюць, што робіцца і выпускаецца ў нашым рэгіёне.
На адкрытай пляцоўцы каля арэны таксама быў арганізаваны выязны гандаль і ўстаноўлены аб'екты грамадскага харчавання. Усё гэта стварала ўдзельнікам мерапрыемства святочны настрой, а таксама давала магчымасць спакойна, больш дэталёва паглядзець цікавыя праекты.
— Добра, што выстава арганізавана ў рэгіёнах, таму што не ўсе змаглі наведаць яе ў Мiнску, - сказаў намеснік дырэктара па ідэалагічнай рабоце КУВП «Бароўка» Аляксандр Малчанаў. - Мы ўбачылі, на што здольныя нашы навукоўцы. Хочацца сказаць, што ўбачанае перасягнула ўсе чаканні. Мы адчулі сапраўдны гонар за навуковыя дасягненні і патэнцыял нашай краіны. Мяне больш усяго зацікавілі пляцоўкі, дзе распавядалі аб вырошчванні раслін у цяпліцах, аб кантролерах пашкоджання трубаправода, свяцільнях святлодыёдных і электрамабілях.
— Важна, што найноўшыя айчынныя распрацоўкі прадпрыемстваў і арганізацый змаглі ўбачыць школьнікі і студэнты. Дзякуючы такім мерапрыемствам у маладых людзей з'яўляецца імкненне спасцігаць новае, дамагацца высокіх вынікаў у вучобе. Сённяшнія падлеткі - будучыня нашай краіны, - адзначыла першы сакратар РК ГА «БРСМ» Вікторыя Пшонка.
У завяршэнне хочацца сказаць, што навуковыя дасягненні пры ўкараненні ў вытворчасць паляпшаюць якасць жыцця і дабрабыт людзей, спрыяе гарманічнаму развіццю нашага грамадства і дзяржавы.
На думку арганізатараў выставы, экспазіцыя задае агульную накіраванасць на бесперапыннае развіццё беларускай навукі, інтэнсіўнае ўзаемадзеянне навукі, адукацыі і вытворчасці, нарошчванне ўкаранення навуковых дасягненняў у рэальны сектар і сацыякультурную сферу, узмацняецца пазітыўны ўплыў на якасць жыцця і дабрабыт беларускага народа.
— Лічу, што выстава ўнікальная. Было шмат разнастайных экспанатаў, якія сапраўды даказалі, што беларуская навука не стаіць на месцы, ідзе наперад упэўненымі крокамі ў розных сферах: медыцыне, сельскай гаспадарцы, інжынерыі і іншых, - падзялілася ўражаннямі начальнік аддзела эканомікi Святлана Палячэнка.
— Я вельмі люблю мерапрыемствы, пашыраючыя далягляд. Мяне ўразіла там абсалютна ўсё. А яшчэ прыемна, што экскурсаводы кожнаму наведвальніку падавалі сваю інфармацыю даступна і зразумела, змястоўна. Мяне перапаўняе гонар за нашу краіну, беларусаў, якія змаглі прыдумаць і стварыць такія ўнікальныя рэчы! - псіхолаг тэрапеўтычнага аддзялення паліклінікі Лепельскай ЦРБ Алена Аўтух.
Удзельнікі дэлегацыі ўдзячныя кіраўніцтву раёна за прадстаўленую магчымасць наведвання выставы.