На тэрыторыі аздараўленчага лагера «Спартакавец» у Віцебскім раёне адбыўся V абласны турыстычны злёт ветэранаў вайны ў Афганістане, у якім актыўны ўдзел прынялі і лепельчане.
На гэты раз ужо традыцыйнае мерапрыемства было прысвечана Году міру і стварэння і набліжэнню знамянальнай даты - 35-годдзю вываду савецкіх войскаў з Афганістана, якое будзе адзначацца 15 лютага 2024 года.
На сустрэчу з баявымі таварышамі прыехалі воіны-інтэрнацыяналісты з усіх раёнаў Віцебскай вобласці, а гэта 100 з лішнім чалавек, а таксама з горада Ступіна Маскоўскай вобласці і Мядзельскага раёна Мінскай вобласці.
У пачатку мерапрыемства з прывітальным словам да ўдзельнікаў звярнуўся старшыня Савета Грамадскага аб'яднання «Беларускі саюз ветэранаў вайны ў Афганістане» Валерый Гайдукевіч, які адзначыў, што такія турзлёты праходзяць толькі ў Гомельскай і Віцебскай абласных арганізацыях, і гэту традыцыю трэба развіваць. Таксама пажадаў усім бескампраміснай барацьбы і перамогі наймацнейшай камандзе.
Прыемна, што на турзлёт разам з ветэранамі прыехалі і прадстаўнікі юнага пакалення, якія з задавальненнем удзельнічалі ў конкурсах, падтрымлівалі сваіх бацькоў і дзядоў. Бо гэта цудоўная традыцыя ў плане патрыятычнага выхавання і пераемнасці пакаленняў, таму што Беларускі саюз ветэранаў вайны ў Афганістане заўсёды ставіць перад сабой задачу - захаваць і перадаць маладому пакаленню памяць аб подзвігах савецкага народа.
На працягу некалькіх дзён воіны-інтэрнацыяналісты ўдзельнічалі ў розных конкурсах і спаборніцтвах, дэманстравалі свае творчыя, спартыўныя таленты, абменьваліся досведам патрыятычнага выхавання моладзі.
Акрамя гэтага, адбыўся кулінарны конкурс, пасля падвядзення вынікаў якога за агульным сталом каманды прадэгуставалі прыгатаваныя стравы пад сяброўскія гутаркі.
З цеплынёй успамінаюць заўсёды ветэраны сустрэчу баявых сяброў увечар у «Вогнішча сяброўства», дзе мужчыны дзеляцца сваімі ўражаннямі аб турзлёце, надзённымі пытаннямі і праблемамі, успамінаюць мінулае, абменьваюцца кантактамі.
Не было роўных нашай камандзе ў спартыўным спаборніцтве па перацягванні каната. Як вядома, тут адна сутычка можа доўжыцца да 5 хвілін, і ўвесь гэты час спартсмены павінны трымацца на мяжы сваіх сіл. Калі хоць адзін расслабіцца - прайгралі. У гэтым этапе спаборніцтва ўдзельнікі павінны быць не толькі моцнымі, але і вельмі цягавітымі. Акцэнтую ўвагу, што ў нашай камандзе былі ўдзельнікі розных узростаў, і самаму старэйшаму з іх - 70 гадоў, але воля да перамогі ўсё роўна дапамагла стаць лідэрамі.
Таксама 1 месца лепельчане занялі ў творчым конкурсе. Музыкант Міхаiл Тарасаў са сваёй праніклівай патрыятычнай песняй, можна сказаць, «падарваў залу». Апладзіравалі нашаму земляку не толькі тыя, хто заўзеў за нашу каманду, але і сур'ёзныя супернікі.
У выніку зборная Лепельска-Лёзненская каманда па выніках спаборніцтваў заняла ганаровае 3-е месца.
Для ўдзельнікаў таксама была арганізавана і насычаная культурная праграма. Воіны ўшанавалі памяць загінуўшых воінаў-інтэрнацыяналістаў ля помніка «Боль» у Віцебску, наведалі экспазіцыю музея воінаў-інтэрнацыяналістаў, пабывалі ў Горадзе майстроў, дзе адчулі непаўторную атмасферу фестывалю «Славянскі базар у Віцебску».
–- Турзлёт, які ўжо стаў традыцыйным у нашай вобласці, дапамагае ўмацаваць сяброўскія сувязі паміж нашымі арганізацыямі, дае магчымасць карысна і актыўна адпачыць, умацаваць здароўе, а таксама дапамагае ўдасканальваць патрыятычную працу з маладым пакаленнем. Бо мы ўсе дзелімся досведам, раімся, як лепш праводзіць сустрэчы з падлеткамі, якія мерапрыемствы з імі можна арганізаваць, каб яны засталіся ў душы ў дзяцей і развівалі ў іх патрыятычныя пачуцці да Радзімы, - адзначыў старшыня Лепельскай арганізацыі ГА «БСВВА» Сяргей Крывель. - Мне вельмі спадабалася сустрэча. Арганізацыя, як заўсёды, на высокім узроўні, але галоўнае, што гэта мерапрыемства - выдатная магчымасць пагутарыць з былымі калегамі.
Цалкам згодна з Сяргеем Мікалаевічам, бо з кожным годам ветэранаў Вялікай Айчыннай вайны становіцца ўсё менш і менш. А воіны-інтэрнацыяналісты могуць распавесці школьнікам і студэнтам аб сваёй службе, таварыстве, вайне, прывіць пачуццё любовi да Радзімы.
У завяршэнне хочацца адзначыць, што Лепельскі раён двойчы прымаў гасцей турыстычнага злёту ветэранаў вайны ў Афганістане, і наш край заўсёды пакідаў незабыўныя ўражанні ва ўдзельнікаў.
Па матэрыялах газеты «Лепельскі край»