Спецыялістамі Лепельскага раённага ЦГіЭ адносна гандлёвых аб'ектаў ажыццяўляецца дзяржаўны санітарны нагляд з максімальным выкарыстаннем мер прафілактычнага і папераджальнага характару. Так, памочнік урача-гігіеніста Вольга Хацкевіч правяла маніторынг крам нашага раёна.
Па выніках нагляднага мерапрыемства ў аўтамагазінах Лепельскага філіяла Віцебскага абласнога спажывецкага таварыства ўстаноўлена, што рэалізацыя прадукцыі ажыццяўлялася праз адчыненыя дзверы, а не праз спецыяльна абсталяванае акно, што з'яўляецца парушэннем. Акрамя гэтага, малочная прадукцыя ў асартыменце з умовамі захоўвання 4±2 захоўвалася па-за халадзільным абсталяваннем пры тэмпературы навакольнага асяроддзя 25°С. Таксама ў аўтамагазіне ажыццяўлялася нарэзка каўбасных вырабаў па просьбах пакупнікоў, што не выключае забруджванне харчовай прадукцыі. Наяўная рукамыйніца для мыцця рук персаналу не выкарыстоўваўся па прызначэнні: ва ўмывальніку адсутнічала вада, ракавіна выкарыстоўвалася для складзіравання тавараў. Таксама прадаўцом аўтамагазіна да рэалізацыі была прапанавана прадукцыя са скончаным тэрмінам прыдатнасці.
У адным з магазінаў гэтага ж філіяла патрабуецца правядзенне рамонту ганка, зашклёная паверхня аднаго з вокнаў пабітая, расколіны залеплены скотчам, астуджаная вітрына для захоўвання малочнай прадукцыі не забяспечана сродкам кантролю тэмпературы.
У іншым гандлёвым аб'екце Лепельскага філіяла тэрыторыя магазіна не прыбрана ад бытавога смецця, у гандлёвай зале знойдзена вялікая колькасць мух, маразільны куфар для захоўвання мясных паўфабрыкатаў не забяспечаны сродкам кантролю тэмпературы і выяўлены іншыя парушэнні.
У крамах «Капеечка» ЗАТ «Дабраном» таксама выяўлены парушэнні. Так, напрыклад, складскія памяшканні, мыйная, фасовачная, санвузел, пакой для персаналу не ўтрымоўваліся ў чысціні, у маразільнай і халадзільнай камерах складскога памяшкання не размежавана захоўванне сырой і гатовай да ўжывання прадукцыі. Акрамя гэтага, у дадзеных камерах ажыццяўлялася захоўванне браку, сапсаванай прадукцыі і прадукцыі, канфіскаванай з абарачэння.
У гандлёвай зале рэалізацыя сырой харчовай прадукцыі (астуджаныя паўфабрыкаты з мяса птушкі, тушкі птушкі, яйкі курыныя) ажыццяўлялася побач з гатовай да ўжывання прадукцыяй. Таксама да рэалізацыі была прапанавана прадукцыя са скончаным тэрмінам прыдатнасці.
Не спрацавалі без парушэнняў і месцы грамадскага харчавання. Так, напрыклад, у міні-кафэ «Сушы дом» па вул. Будзённага, 12 тэрыторыя вакол міні-кафэ не прыбрана ад бытавога і будаўнічага смецця, недакуркаў.
У міні-кафэ патрабуецца правядзенне рамонту: на харчаблоку множныя дэфекты сцен і лінолеўмнага пакрыцця падлогі; у памяшканні для персаналу сцены і падлога выкананы з матэрыялаў, якія не падвяргаюцца мыццю і дэзінфекцыі. Усе ракавіны для мыцця рук не забяспечаны сродкам для апрацоўкі рук і ручнікамі разавага карыстання або прыладай для сушкі рук. На ўчастку, дзе ажыццяўляецца прыгатаванне халодных закусак, не забяспечана праца бактэрыцыднага асвятлення. Таксама выяўлены і іншыя парушэнні.
Правяраючыя трымаюць работнікаў гандлю і грамадскага харчавання ў тонусе, і пакуль без гэтага не абысціся. Прыйсці могуць у любую краму ці кафэ, і гэта стымул, каб працаваць па правілах.
Наталля Храпавіцкая , газета «Лепельскі край»