Дзень адчыненых дзвярэй у Лепельскім РДК для навучэнцаў сярэдніх навучальных устаноў Лепельскага і Чашніцкага раёнаў правялі супрацоўнікі ўпраўлення ўнутраных спраў Віцебскага аблвыканкама.
Хто такі міліцыянер? Што ўключае ў сябе праца ў органах унутраных спраў? Пад звыклым нам словам «міліцыя» маецца на ўвазе цэлы шэраг служб і падраздзяленняў. Вельмі розных, непадобных адзін на адно, але аб'яднаных адной агульнай мэтай - абараняць правы чалавека, ратаваць людзей, прадухіляць і спыняць правапарушэнні, затрымліваць парушальнікаў. Усё гэта, паводле «Закону аб унутраных органах РБ», абавязак любога супрацоўніка ўнутраных справаў, незалежна ад пасады, месца знаходжання і часу. Перад падлеткамі выступіў старшы інспектар аддзела кадраў УУС Віцебскага аблвыканкама падпалкоўнік міліцыі Аляксандр Радзевіч, які давёў да моладзі падрабязную актуальную інфармацыю аб службе ў міліцыі, расказаў аб сацыяльных ільготах і гарантыях, якія прадастаўляюцца супрацоўнікам.
Таксама навучэнцы даведаліся аб факультэтах, спецыфіцы кожнай спецыяльнасці, уступных іспытах, якія павінны прайсці абітурыенты пры паступленні, аб тэрмінах падачы дакументаў у ВНУ Міністэрства ўнутраных спраў Рэспублікі Беларусь. Многія ўзялі інфармацыйныя буклеты, каб дома больш падрабязна азнаёміцца з атрыманай інфармацыяй.
Змаглі навучэнцы і паглядзець відэафільм, з якога даведаліся аб дзейнасці супрацоўнікаў міліцыі, аб вучобе і жыцці ў акадэміі і ўніверсітэце, атрымаць адказы на пытанні.
У цяперашні час падрыхтоўку кваліфікаваных спецыялістаў для органаў унутраных спраў у вочнай форме навучання ажыццяўляюць установы адукацыі «Акадэмія Міністэрства ўнутраных спраў Рэспублікі Беларусь» і «Магілёўскі інстытут Міністэрства ўнутраных спраў Рэспублікі Беларусь», а таксама ўстанова адукацыі «Спецыялізаваны ліцэй МУС Рэспублікі Беларусь». Тэрмін навучання ў ВНУ складае 4 гады, пасля заканчэння якіх выпускнікі атрымліваюць дыплом аб вышэйшай юрыдычнай адукацыі з прысваеннем кваліфікацыі «юрыст» або «юрыст з веданнем эканомікі». Сярод пераваг тое, што навучанне ў Акадэміі і інстытуце МУС бясплатнае, на час навучання курсант атрымлівае поўную экіпіроўку і месца ў інтэрнаце. Акрамя таго, усе курсанты забяспечаны трохразовым харчаваннем і добрай стыпендыяй. Затым перад старшакласнікамі і навучэнцамі каледжа выступіў намеснік начальніка аддзела ўнутраных спраў Чашніцкага райвыканкама па ідэалагічнай рабоце і кадравым забеспячэнні, па пытаннях прыёму і праходжання службы, падпалкоўнік міліцыі Андрэй Любезны. Андрэй Міхайлавіч расказаў аб сваім прафесійным шляху, вучобе, першых уражаннях аб службе ў органах. Ён таксама адзначыў, што людзей, якія прыходзяць у гэту прафесію, аб'ядноўвае пачуццё адказнасці, прынцыповасць і сумленнасць, воля і мужнасць.
Перад моладдзю выступіў выпускнік Акадэміі МУС Рэспублікі Беларусь Данііл Калінін.
Данііл працуе ўчастковым інспектарам міліцыі ў РАУС. Малады супрацоўнік адзначыў, што прафесія «юрыст» вельмі важная і патрэбная ў жыцці. А таксама вельмі паважаная ў грамадстве, бо гэта чалавек, які стаіць на варце інтарэсаў і правоў іншых людзей.
З пераваг вучобы ў акадэміі — дастойная стыпендыя, жыллё і шмат іншага.
Цікавымі і насычанымі былі пляцоўкі ад праваахоўнікаў Віцебшчыны. Узбраенне, інтэрактыўныя заданні і конкурсы - усё гэта было ўключана ў праграму мерапрыемства. Акрамя гэтага, хлопцы даведаліся шмат цікавых фактаў аб службе ў міліцэйскіх шэрагах. Яны змаглі патрымаць у руках каскі, аўтаматы, пісталеты і многае іншае. Многія хлопцы праверылі сябе на трапнасць у інтэрактыўным цiры. Сваю найноўшую амуніцыю і зброю прадэманстравалі супрацоўнікі АМАП упраўлення ўнутраных спраў Віцебскага аблвыканкама.
Не засталася без увагі і выстава фуражак, якія кожны мог прымерыць. Магчыма, пасля гэтай сустрэчы хтосці ў наступным годзе таксама скажа з гонарам «Я – курсант міліцэйскай ВНУ».
Нагадваем, што для паступлення ў міліцэйскія ВНУ і за больш падрабязнай інфармацыяй усе жадаючыя могуць звярнуцца ў Лепельскі РАУС.
Таксама вялікая падзяка артыстам РДК, якія падрыхтавалі цудоўную канцэртную праграму.
Наталля Храпавіцкая. Газета «Лепельскі край»