З 13 па 15 красавіка на базе рэспубліканскага цэнтра алімпійскай падрыхтоўкі па гульнявых відах спорту «Палац спорту» праходзіць 25-я Міжнародная вясновая выстава турыстычных паслуг «Адпачынак-2023».

Гэта самая буйная турыстычная выстава Беларусі ў катэгорыі «Турызм і адпачынак», свайго роду міжнародная дзелавая пляцоўка для краін, рэгіёнаў і турыстычных кампаній з усяго свету, якія прадстаўляюць свае прадукты і паслугі на беларускім рынку.

Прыемна адзначыць, што ў гэтым маштабным мерапрыемстве прымаюць удзел намеснік старшыні Лепельскага райвыканкама Аксана Церашкова, загадчык сектара спорту і турызму райвыканкама Алена Скарбо, метадыст па турызме інфармацыйна-турыстычнага цэнтра сектара спорту і турызму райвыканкама Ніна Васільева, прадстаўнікі Бярэзінскага біясфернага запаведніка, КУП ДРАЦ «Жамчужына» і іншыя жыхары нашага раёна.

– Лепельшчына – асаблівы край, з прыгожымі мясцінамі, шматлікімі гісторыка-культурнымі каштоўнасцямі. Акрамя гэтага, на тэрыторыі раёна ёсць унікальны прыродны комплекс, які ўключае ў сябе выключную разнастайнасць розных тыпаў лясоў, лугоў і балот, унікальны пойменны комплекс ракі Бярэзіны, мноства вялікіх і малых рэк, непаўторныя азёры. Гэта Бярэзінскі біясферны запаведнік, які з'яўляецца адзінай у Рэспубліцы Беларусь асабліва ахоўнай прыроднай тэрыторыяй самага высокага рангу. Прадстаўнікі ўстановы таксама бяруць удзел у выставе.

Кожны аматар як актыўнага, так і спакойнага адпачынку знойдзе, куды з'ездзіць і што паглядзець на Лепельшчыне, - упэўнена намеснік старшыні райвыканкама Аксана Церашкова. -- У нашым раёне ёсць турыстычны патэнцыял, які карыстаецца попытам у турыстаў.

Супрацоўнікі запаведніка на міжнароднай выставе прадэманстравалі шматлікім гасцям перавагі актыўнага і займальнага адпачынку ў маляўнічых мясцінах на Лепельшчыне. Грамадзяне не толькі з Беларусі, але і іншых краін цікавіліся экскурсійнымі турамі і праграмамі, звярталіся па кансультацыю да спецыялістаў.

-- Гэта выстава - выдатная магчымасць заявіць пра сябе, бо ў праграме індустрыяльны, медыцынскі і гастранамічны, экстрэмальны і спартыўны турызм, новыя турыстычныя брэнды і многае іншае, - адзначыла Алена Скарбо. -- Асабліва цікавая і пазнавальная для нас тэма аграэкатурызму. У нашай краіне больш за 3000 аграсядзіб, і кожная з іх па-свойму ўнікальная і непаўторная. На выставе аграэкатурызм прадстаўлены вялікай колькасцю ўдзельнікаў: адны запрашаюць на летнюю рыбалку ці конную прагулку, іншыя расказваюць наведвальнікам сакрэты прыгатавання старажытных страў, трэція прэзентуюць сапраўдную рускую лазню.

Пра маштаб мерапрыемства кажа і тое, што ўдзел у ім бяруць прадстаўнікі Узбекістана, Грузіі, Расіі і іншых краін.

Адказы на многія актуальныя пытанні ўдзельнікі выставы могуць атрымаць падчас круглых сталоў, семінараў, прэзентацый.

Наталля Храпавіцкая. Газета «Лепельскі край»