Каб было зразумела, аб чым ідзе гаворка, растлумачым значэнне гэтага слова. «Бёрдынг» – гэта аматарская арніталогія, якая ўключае назіранне і вывучэнне птушак няўзброеным вокам альбо пры дапамозе бінокля.

Фотабёрдынг - гэта калі птушак трэба не толькі ўбачыць, але і сфатаграфаваць.

У ясны вераснёўскі дзень удзельнікі спаборніцтва адправіліся па запаведных сцежках, дзе змаглі не толькі ўбачыць, пачуць і сфатаграфаваць розных птушак, але і адчуць атмасферу некранутай прыроды, а таксама назіраць вясковыя краявіды і слухаць гукі восеньскага лесу.

Пасля падарожжа яны падрыхтавалі і здалі фатаграфіі і чэк-лісты журы. Трэба сказаць, камісіі было складана вызначыць пераможцаў, бо у кожнага ў фотаздымках была свая разыначка і ўнікальнасць.

Па колькасці набраных балаў пераможцам спаборніцтваў стала каманда Наталлі Косар і Інэсы Паркулевіч, якія ў якасці прыза атрымалі падарункавы сертыфікат на экскурсію «Жывы аркестр». Другое месца заняла каманда Святланы Савіцкай і Вольгі Гаўрош, яны адправяцца на экскурсію «Рачны будаўнік». На трэцяй прыступцы пастамента апынуліся Таццяна Карніловіч і Ганна Мялік, якія змогуць наведаць экскурсію «Сустракаем птушыных».

Падрыхтавала Наталля Храпавіцкая, газета «Лепельсы край»