Штодня на будаўніцтве фізкультурна-аздараўленчага комплексу ў Лепелі працуюць як мінімум 60 працоўных з розных будаўнічых арганізацый. Кожны дзень вышыня цаглянага мура падрастае, вымалёўваюцца абрысы будучага важнага аб'екта.
– Для лепельчан будучы ФАК сапраўды знакавы аб'ект, якога з нецярпеннем чакаюць як дзеці, так і дарослыя, - адзначыў намеснік старшыні райвыканкама Сяргей Быстрыцкі. - Задзейнічаны сілы чатырох будаўнічых арганізацый, а таксама байцоў студатрада з Лепельскага аграрна-тэхнічнага каледжа, каб паскорыць працэс і як мага хутчэй здаць аб'ект у бягучым годзе.
Мы пабывалі на будоўлі, дзе кіпела праца на розных участках. Брыгадзір цесляроў Лепельскай ПМК-75 Міхаіл Доўгі дакладна і аператыўна падаваў ваду, цэмент, дробны керамзіт у бетонамяшалку. А з яе па спецыяльным рукаве сумесь паступала работнікам на вышыні - яны залівалі падмурак пад падлогі. Не стаялі без справы і два вежавых крана, няспынна разгружаючы будматэрыялы.
Унутры аб'екта ўжо добра відаць былі чары будучых басейнаў, аднаго паменш - для дзяцей, іншага пабольш - на тры дарожкі па 25 метраў для дарослых.
– Калі чара пад дзіцячы басейн ужо гатова, то на другой ідзе заліванне. бетоннай сумессю трэцяга пласта. Гэта робяць бетоншчыкі прыватнай полацкай фірмы «Алекс-Мантаж». Затым зоймуцца апалубкай чары. Тынкоўшчыкі нашай арганізацыі выконваюць унутраныя працы, вядуць мантаж крылцаў, – уводзіў у курс справы прараб ПМК-75 Антон Буйніцкі.
Паралельна будаўнікі Шумілінскай ПМК-70, «Белсантэхмантажу» ўкладвалі бардзюры, узводзілі сцены, працягвалі вентыляцыйныя камунікацыі. Працы хапала ўсім, а за каардынацыяй працэсаў сачыў малады прараб. Дарэчы, па прызнанні Антона Буйніцкага, у яго асабісты інтарэс да дадзенай будоўлі. Як бацька траіх дзяцей (хлопчыку 12 гадоў і дзяўчынкам-двайнятам па 6), ён з нецярпеннем чакае ўводу аб'екта ў строй. Будзе і сам наведваць басейн і трэнажорную залу, і дзяцей вадзіць у ФАК.
– Любая будоўля звязана з вялікім аб'ёмам земляных, пагрузачна-разгрузачных работ, добраўпарадкаваннем тэрыторыі, - падкрэсліў ён. - Вельмі добрую дапамогу спецыялістам аказалі байцы студатрада «Даміно» з Лепельскага аграрна-тэхнічнага каледжа, якія працавалі на аб'екце два месяцы.
- Навучэнцамі засталіся задаволеныя і выкладчыкі, - падкрэсліла намеснік дырэктара па вучэбна-вытворчай рабоце Лепельскага аграрна-тэхнічнага каледжа Алеся Пшанко. - Працавалі ў будатрадзе восем трэцякурснікаў - будучых тэхнікаў-будаўнікоў. Была ў іх і працоўная кваліфікацыя муляроў і тынкоўшчыкаў. Дапамагаючы вопытным будаўнікам, хлопцы павышалі сваю кваліфікацыю, набывалі навыкі. І вытрымалі выпрабаванне годна, што пацвердзіла паспяховая абарона вытворча-тэхналагічнай практыкі.
Камандзір атрада Даніла Пятрушко не прамінуў падкрэсліць, што хлопцы цяпер ведаюць кошт будаўнічым працам у прамым і пераносным сэнсе. Па словах хлопца, пры добрым раскладзе можна нядрэнна зарабіць. Прафесія будаўніка хоць і складаная, але ганаровая. А баец атрада Даніла Сяменька адзначыў, што яму прыемна бачыць плён сваёй працы.