Нягледзячы на поспехі медыцыны і намаганні ўрачоў ад грыпу і яго ўскладненняў у свеце штогод гінуць людзі. Адзіны эфектыўны спосаб прафілактыкі грыпу - гэта правядзенне вакцынацыі.

Як нам распавяла загадчыца паліклінікі УАЗ «Лепельская ЦРБ» Аксана Клавовіч, ва ўстанову паступіла «Вакцына для прафілактыкі грыпу» інактываваная. Яна эфектыўная, бяспечная і добра пераносіцца. Прышчэпку названай вакцынай можна атрымаць на бясплатнай аснове, па сведчаннях, у паліклініцы УАЗ «Лепельская ЦРБ».

Для дарослага насельніцтва - у кабінеце №11 (на 2 паверсе) з 9.00 да 13.00 па буднях, пасля агляду і заключэння памочніка ўрача, у кабінеце №28 (на 2 паверсе), а таксама ў АУАП, ФАПах. Для дзіцячага насельніцтва - у кабінеце №31 дзіцячай кансультацыі, па аўторках і чацвяргах з 9.00 да 13.00 пасля агляду педыятра. Таксама вакцынацыю супраць грыпу можна праводзіць сумесна з прышчэпкамі ад COVID-19.

-- Аксана Сямёнаўна, чаму прышчапляцца супраць грыпу неабходна кожны год?

-- Гэта звязана ў першую чаргу з высокай зменлівасцю віруса грыпу. Менавіта таму штогод, паводле прагнозаў СААЗ распрацоўваюцца новыя вакцыны, якія будуць эфектыўны менавіта супраць актуальных штамаў віруса грыпу. У арганізме застаюцца антыцелы ад папярэдніх вакцынацый, аднак яны аказваюцца нямоглымі супраць новых штамаў віруса грыпу. 

Ахоўны эфект пасля вакцынацыі, як правіла, надыходзіць праз 8-12 дзён і захоўваецца да 12 месяцаў, у сувязі з чым правядзенне прышчэпак рэкамендавана штогод у перадсезонны перыяд актывізацыі распаўсюджвання вірусаў грыпу (звычайна ў восеньскі перыяд).

-- Хто павінен прайсці абавязкова імунізацыю?

-- Абавязковай імунізацыі супраць грыпу згодна нацыянальнаму календару прафілактычных прышчэпак падлягаюць асобы, якія адносяцца  да катэгорыі высокай рызыкі захворвання на грып і неспрыяльных ускладненняў. Да іх адносяць дзяцей ва ўзросце ад 6 месяцаў да 3 гадоў, дзяцей ва ўзросце ад 3 гадоў і дарослыя з хранічнымі захворваннямі, асобы з імунасупрэсіяй, асобы ва ўзросце старэйшыя за 65 гадоў, цяжарныя жанчыны, работнікі сферы бытавога абслугоўвання, работнікі ўстаноў адукацыі, работнікі гандлю і грамадскага харчавання, работнікі транспартных арганізацый, асобы, якія знаходзяцца ў кантакце з пацыентам з хранічнай паталогіяй і імунасупрэсіяй, асобы, якія знаходзяцца ў кантакце з дзецьмі да 6 месяцаў і іншыя.

Гаварыла Наталля Храпавіцкая. Газета «Лепельскі край»