15 лютага адзначаецца Дзень вываду войскаў з Афганістана. Гэта дзень памяці аб тых, хто не вярнуўся з той вайны, і дзень падзякі героям, якія жывуць сярод нас. У Лепельскім раёне ў гэты дзень прайшлі ўрачыстыя мерапрыемствы, прысвечаныя воінам-інтэрнацыяналістам.
Каля аграрна-тэхнічнага каледжа адбыўся мітынг-рэквіем, на якім былі сказаны словы падзякі і павагі да тых, хто выконваў свой інтэрнацыянальны абавязак на тэрыторыі блізкага і далёкага замежжа. У мерапрыемстве прынялі ўдзел ветэраны вайны ў Афганістане, прадстаўнікі ўлады, сілавых структур, грамадскіх арганізацый і многія іншыя неабыякавыя жыхары горада. Яны ўсклалі вянкі і жывыя кветкі да помніка воінам-інтэрнацыяналістам.
Таксама мітынгі і ўскладаннi кветак і вянкоў прайшлі на тэрыторыі пахаванняў, дзе знаходзяцца палеглыя воіны. Адно з такіх месцаў - Пятроўскія могілкі ў Лепелі. Прысутныя ўшанавалі памяць герояў хвілінай маўчання і ўсклалі кветкі.
Яшчэ адно месца, дзе сабраліся ветэраны і ганаровыя госці, - могілкі паблізу вёскі Вялікі Поўсвіж.
Дзень вываду войскаў з Афганістана - гэта свята афганцаў-ветэранаў і дзень памяці аб усіх загінуўшых воінах-інтэрнацыяналістах. Гэта святая дата для тых, хто ваяваў на чужой зямлі, бачыў смерць сяброў і маладых хлопцаў, у якіх, здавалася б, усё жыццё наперадзе. Шмат гора, бед і пакут прынеслі нашаму народу гэтыя дзевяць гадоў, адзін месяц і васямнаццаць дзён.
Сённяшнія ветэраны-інтэрнацыяналісты - гэта сапраўдныя патрыёты, пераемнікі ветэранаў Вялікай Айчыннай вайны. Яны сваёй мірнай працай дэманструюць актыўную жыццёвую і грамадзянскую пазіцыю, удзельнічаюць у патрыятычным выхаванні моладзі. У нашым раёне пражывае 141 чалавек, дзесяцігоддзі таму выконваўшы інтэрнацыянальны абавязак.