Арыгінальныя рукатворныя работы прадставілі настаўнік выяўленчага мастацтва дзяржаўнай установы адукацыі “Гімназія імя І.М. Ерашова г.Лепеля» Ларыса Станкевіч, а таксама яе падапечныя – удзельнікі майстэрні лепкі «Дамавята».

Скрапбукінг, асамбляж, калаж - для кагосьці гэта зусім незнаёмыя словы, а для гераіні нашага матэрыялу гэта цэлым свет, які ўвабраў у сябе разнастайнасць матэрыялаў, струмень непрадказальных творчых ідэй і, як вынік, багацце вырабаў, унікальных сувеніраў і карысных рэчаў.

Калi робiш першыя крокі ў выставачную залу, разумееш - са з'яўленнем тут дзіўных работ, зробленых рукамі Ларысы Леанідаўны, гэтае месца нібы напоўнілася жыццём, цеплынёй рук і душэўнасцю. Гэта насамрэч так. Бо кожная прадстаўленая на выставе праца - гэта асобная гісторыя, "прачытваць" якую - адно задавальненне.

Ацаніць творчае багацце Ларысы Станкевіч і яе вучняў у краязнаўчы музей прыйшло нямала гасцей - гэта калегі Ларысы Леанідаўны і сябры, педагогі іншых устаноў адукацыі і культуры, блізкія і родныя ёй людзі. Сузіраючы прадстаўленую прыгажосць, госці заміралі ў кожнага экспаната і прагна сілкаваліся іх творчай сілай і энергіяй.

Родам гераіня матэрыялу з вёскі Загліннікі Лепельскага раёна. Пачатковую і сярэднюю адукацыю будучы педагог атрымала ў Колтаўскай 8-гадовай школе нашага раёна, а таксама Кашчынскай школе Чашніцкага раёна. Далей дзяўчына паступіла ў Віцебскі дзяржаўны педагагічны інстытут імя С.М. Кірава, дзе пасля заканчэння вучобы атрымала спецыяльнасць "настаўнік чарчэння, працы і выяўленчага мастацтва".

Першым месцам працы Ларысы Леанідаўны стала Лепельская школа-інтэрнат, дзе малады педагог прапрацавала 10 гадоў. У наступныя гады месцам працы нашай таленавітай зямлячкі была гімназія імя І.М. Ерашова г. Лепеля. З 1 верасня гэтага года Ларыса Леанідаўна пакідае ўстанову і ідзе на заслужаны адпачынак. А за плячыма ў гераіні матэрыялу - 46 гадоў педагагічнага стажу.

Трэба сказаць, што Ларыса Леанідаўна - не адзіны педагог у сваёй сям'і. З высакароднай прафесіяй настаўніка таксама былі звязаныя і бацькі жанчыны - Леанід і Вера Пахомавы. Да сямейнай дынастыі педагогаў неўзабаве далучылася і дачка Ларысы Леанідаўны - Кацярына Прыстаўка. Самым юным педагогам у сям'і неўзабаве стане і ўнучка гераіні публікацыі - Валерыя. Дзяўчына будзе настаўнікам у пятым пакаленні. У дзень адкрыцця выставы родныя былі побач.

-- У сваіх творчых працах я выкарыстоўваю многія тэхнікі дэкаратыўнага мастацтва. Захапляюся калажамі з сямейных фатаграфій. Таксама ёсць шмат кампазіцый, выкананых з выкарыстаннем аб'ёмных дэталяў ці цэлых прадметаў. У тэхніцы дэкупажу ўпрыгожваю старажытныя і сучасныя прадметы побыту. Кераміка, выцінанка, аплікацыя з розных матэрыялаў, роспіс па бяросце, ікебана, шыццё і многае іншае - вось мае любімыя напрамкі ў творчасці, - распавяла Ларыса Леанідаўна.

Суразмоўніца прызналася, што ўсе працы, прадстаўленыя на выставе, упрыгожваюць яе кватэру і кватэру дзяцей. Таксама многія кампазіцыі ўпрыгожваюць сцены роднай гімназіі. Жанчына любіць калекцыянаваць прыродныя матэрыялы, бытавы і прамысловы «хлам», якому дае шанец на другое жыццё, выкарыстоўваючы для сваіх твораў.

- Няхай будзе менш смецця на планеце, а больш прыгажосці. Фантазія не нараджаецца на пустым месцы. Ёй трэба ад нечага адштурхнуцца. Гэтак жа думаў і Томас Эдысан: "Каб прыдумаць, трэба добрае ўяўленне і шмат хламу", – падкрэсліла аўтарка работ.

Як прызналіся госці выставы, работы зачароўваюць сваёй прыгажосцю і непрадказальнасцю. Некаторыя педагогі, якія ўжо ацанілі экспазіцыю, падгледзелі і для сябе нешта незвычайнае і дзіўнае ў творчасці Ларысы Леанідаўны. Абыякавым сысці не ўдалося нікому. Мы ж заклікаем лепельчан таксама наведаць раённы краязнаўчы музей і атрымаць эстэтычнае задавальненне ад убачанага.