На сустрэчы прысутнічалі навучэнцы каледжа г. Лепеля і запрошаныя госці: благачынны Лепельскай акругі, протаіерэй Сяргей Ляшкевіч, начальнік аддзела загса Лепельскага райвыканкама Алена Бельская, урач агульнай практыкі ЦРБ Лізавета Скавародка, майстар аварыйна-дыспетчарскай службы Лепельскага раёна газазабеспячэння Андрэй Азарэнка.
Даследаванні паказваюць, што добрыя дзеці растуць у шчаслівых сем'ях, дзе бацька і маці любяць адзін аднаго. Вядомы педагог Антон Макаранка пісаў: «Хочаце, каб былі добрыя дзеці - будзьце шчаслівыя. Разарвіцеся на часткі, выкарыстоўвайце ўсе свае таленты, здольнасці, прыцягніце сваіх знаёмых, але будзьце шчаслівыя сапраўдным, чалавечым шчасцем».
Протаіерэй Сергій Ляшкевіч распавёў прысутным, як важна шанаваць і аберагаць сваю сям'ю, бо яна ствараецца для таго, каб прайсці разам мноства жыццёвых урокаў. А шчаслівая сям'я - гэта калі шчаслівыя бацькі. Даўным-даўно вядома, калі дзіця бачыць, што бацькі кахаюць і засцерагаюць адзін аднаго, то яму спакойна і яно шчаслівае. Протаіерэй нагадаў, што сапраўднае каханне – гэта ахвярнасць, гэта здольнасць дзеля каханага чалавека, яго шчасця пераступіць праз любыя свае амбіцыі, эгаізм, ганарыстасць, гэта гатоўнасць ахвяраваць сваімі асабістымі інтарэсамі і нават жыццём. Што такое сям'я, калі яна ўтворыцца?
Ці можам мы лічыць момант рэгістрацыі такой кропкай адліку? І ці заўсёды з моманту рэгістрацыі, не «я» і «ты», а «мы»? На гэтыя пытанні адказала Алена Бельская. Таксама яна падзялілася цікавай інфармацыяй аб тым, колькі шлюбаў рэгіструецца аддзелам ЗАГС і які сярэдні ўзрост уступаючых упершыню ў шлюб. Было адзначана, што нараджальнасць у нашым раёне, нажаль, падае. За тры кварталы гэтага года нарадзілася ўсяго каля 200 дзяцей. Разам з тым, вялікім здзіўленнем стала, што самая высокая нараджальнасць у нашым раёне была ў 1949 годзе - каля 1400 нованароджаных. Пра тое, што трэба ведаць, каб сям'я і дзеці былі здаровымі, нараджаліся і раслі ў каханні і мiры, расказала ўрач агульнай практыкі Лізавета Скавародка. Яна падзялілася з удзельнікамі мерапрыемства правіламі здаровага ладу жыцця і як усцерагчы сябе ад хвароб. Як засцерагчы свой дом і сям'ю ад няшчасных выпадкаў, звязаных з выкарыстаннем газу і газавых прыбораў у побыце, растлумачыў Андрэй Азарэнка. Што такое чадны газ, прычыны атручвання ўгарным газам, аб першых сімптомах і як аказаць першую дапамогу - аб гэтым даведаліся прысутныя. Ступень небяспекі ўгарнага газу не ўсімі людзьмі ацэньваецца адэкватна, бо ён не мае колеру і паху і гэта становіцца прычынай многіх трагедый. Таму важна, каб у дамах былі ўстаноўлены газааналізатары. Гэта тэма зараз вельмі актуальная ў сувязі з надыходам ацяпляльнага сезона. Напрыканцы выступлення Андрэй Азарэнка заклікаў усіх прытрымлівацца правілаў бяспекі і берагчы свае сем'і. Усё далей ад нас адыходзіць традыцыя сустракаць святы ўсёй сям'ёй, у бацькоўскай хаце. Але калі не пашкадаваць часу на тое, каб сабраць усіх родных, то мы даведаемся самае дзіўнае шчасце на зямлі, выяўленае прыказкай: «Уся сям'я разам - так і душа на месцы».