Сёння цэнтральная раённая бібліятэка нашага горада ўпісала новы раздзел у сваю гісторыю. У галоўным кнігасховішчы нашага раёна адкрылася новая экспазіцыя пад назвай «Кніга – часоў злучаючая нітка». Экспазіцыя стала свайго роду музеем літаратурных выданняў і розных прадметаў, крыніцай падзей і фактаў, якія перадаюцца з пакалення ў пакаленне з дапамогай галоўнай крыніцы ведаў – кнігі.
Адкрыццё экспазіцыі стала вялікім святам для ўсяго калектыву цэнтральнай бібліятэчнай сістэмы і цікавай падзеяй для жыхароў нашага горада. Гасцей мерапрыемства гасцінна сустрэла дырэктар установы Алена Мазго. Кіраўнік падзякавала кожнаму, хто прыйшоў падзяліць гэту значную і доўгачаканую падзею з супрацоўнікамі бібліятэкі. Таксама з прывітальным словам да прысутных звярнулася загадчыца сектара культуры Лепельскага райвыканкама Алена Барадзейка.
-- Перш за ўсё, хачу сказаць, што адкрыццё новай экспазіцыі – гэта вынік каласальнай працы работнікаў цэнтральнай бібліятэчнай сістэмы. Выказваю вялікую падзяку і ўдзячнасць усім, хто прымаў удзел у распрацоўцы дызайну экспазіцыі, прарабіў карпатлівую навукова-даследчую працу і неўзабаве напоўніў стэнды, паліцы і вітрыны такімі эксклюзіўнымі і цікаўнымі выданнямі і прадметамі. Экспазіцыя падарыла збольшага забытым рэчам новае жыццё. Усё набыло парадак, сістэматызавалася і знайшло сваё месца.
Першую экскурсію па зале правяла бібліёграф Алена Стайнова.
-- Наша бібліятэка ставіць перад сабой задачу паказаць гісторыю кнігі і яе развіццё на тэрыторыі Беларусі, таму асобная экспазіцыя
прысвечана гісторыі ўзнікнення кнігі на Беларусі і дзейнасці
Францыска Скарыны, а таксама яго паслядоўнікаў, - так пачала сваё апавяданне бібліёграф. Кнігі Вільяма Шэкспіра «Кароль лір» і Івана Тургенева «Рудзін. Напярэдадні», выдадзеныя на беларускай мове, «Кніга карысных парад» 1958 года выдання пад складаннем Аляксандры Вус, кніга Уладзіміра Лабанка «Партызаны прымаюць бой» 1972 года выдання з дароўным надпісам самога аўтара, кнігі для сляпых, надрукаваныя шрыфтам Брайля, аўдыёкніжкі, пласцінкі, дыяпраектары, відэакасеты – гэтыя і іншыя ўнікальныя выданні напоўнілі лакацыю, і яны, сапраўды, заслугоўваюць увагі лепельчан.
Адзначым, што экспазіцыя знаёміць не толькі з цікавымі кніжнымі выданнямі, але і з цікавымі прадметамі, якія перадаюць гісторыю развіцця кнігадрукавання. Супрацоўнікам бібліятэкі ўдалося сабраць разам дзясяткі рэчаў і стварыць сапраўды сакральную атмасферу новага для лепельчан месца. Кожная рэч, кожная кніга, нібы чалавечыя лёсы… Яны шмат чаго бачылі, праз шмат чаго прайшлі, шмат чаго ў сабе ўтойваюць. Яны нясуць гісторыю, самабытнасць, культуру і нашу нацыянальную непаўторнасць.
Адміністрацыя Лепельскай цэнтральнай бібліятэчнай сістэмы выказвае вялікую падзяку і ўдзячнасць за аказанне падтрымкі і дапамогі ў развіццi бібліятэчнай справы на Лепельшчыне кіруючаму актыву раённага выканаўчага камітэта і асабіста - кіраўніку раёна Міхаілу Кісялевічу. Таксама кіраўніцтва бібліятэкі дзякуе ганароваму грамадзяніну Лепельскага раёна Уладзіміру Гарбачову за аказанне дапамогі ў адкрыццi экспазіцыі «Кніга – часоў злучаючая нітка».