На святочную службу прыйшло шмат гасцей, а таксама святары, якія ў розны час служылі ў Лепелі і займаліся аднаўленнем святыні.
З віншавальным словам выступіў старшыня Лепельскага райвыканкама Міхаіл Кісялевіч, які падзякаваў святарам і вернікам за вернасць хрысціянскім традыцыям і каштоўнасцям і велізарную сістэмную работу, якая дазволіла касцёлу Святога Казіміра стаць сапраўднай жамчужынай Лепельшчыны.
Адным з самых сімвалічных момантаў урачыстасці стала асвячэнне біскупам Віцебскім Алегам Буткевічам копіі карціны італьянскага мастака Леанарда да Вінчы «Тайная вячэра» і алтара з рэліквіямі святых, якія былі ўстаноўлены напярэдадні.
Касцёл Святога Казіміра - гэта не толькі прыгожы і велічны будынак, але і сведка шматвяковай гісторыі нашага краю. Ён перажыў пажары, войны, рэвалюцыі, атэізм і забыццё. Ён быў зачынены, разбураны, закінуты, але не памёр. Ён адрадзіўся і жыве дзякуючы веры, любові і працы святароў і вернікаў.