Сёння ў Лепельскім дзяржаўным аграрна-тэхнічным каледжы было вельмі шматлюдна. Выкладчыкі перадавых ВНУ Беларусі разам са сваімі студэнтамі, супрацоўнікі МБГА «ЭкаБудаўнік», партнёры з Германіі (анлайн), а таксама навучэнцы каледжа сталі ўдзельнікамі маштабнай навуковай канферэнцыі «Чыстая вада і санітарныя збудаванні ў перыяд змены клімату».

І хоць назва здаецца крыху складанай і афіцыйнай, мерапрыемства прайшло вельмі ярка, пазнавальна і даступна для падлеткавай аўдыторыі.
Арганізавана канферэнцыя ў рамках праекта PN 117 «Абарона і захаванне водных рэсурсаў у Беларусі» і прадугледжана для студэнтаў тэхнічных навучальных устаноў, а таксама экспертаў і спецыялістаў воднага сектара. Карысны вопыт у рамках праекта
Як адзначыў дырэктар установы адукацыі Алег Лебедзь, паміж МБГА «ЭкаБудаўнік» і каледжам ужо склаліся партнёрскія адносіны, бо гэта тэма вельмі блізкая і важная для навучэнцаў, таму што яны вывучаюць дысцыпліну «Водазабеспячэнне, водаадвядзенне і ахова водных рэсурсаў». Многія з іх неўзабаве стануць спецыялістамі, прыступяць да прафесійнай дзейнасці на прадпрыемствах, і атрыманыя веды будуць вельмі дарэчы. Так, ужо ў рамках праекту ў кастрычніку мінулага года адбыўся семінар «Абарона і захаванне водных рэсурсаў у Беларусі», падчас якога былі разгледжаны тэмы «Энергазберажэнне і гігіена пітной вады», а таксама «Гарачае водазабеспячэнне і ацяпленне аб'екта з прымяненнем сучасных энергаэфектыўных тэхналогій» на прыкладзе культурна-адукацыйнага цэнтра ў вёсцы Стары Лепель.
У лютым гэтага года навучэнцы 283с вучэбнай групы ўдзельнічалі ў працы семінара «Асноўныя прынцыпы працы пясчана-жвіровых фільтраў на прыкладзе функцыянуючага ачышчальнага збудавання ў в. Стахаўцы» Мядзельскага раёна. Экскурсія па функцыянуючаму ачышчальнаму збудаванню, наведванне ветраэнергетычнай устаноўкі, экскурсія на вытворчасць вырабаў з трыснёга - усё гэта выклікала ў падлеткаў непадробную цікавасць, аб чым сведчылі іх шматлікія пытанні да арганізатараў семінара і матэрыялы апытання анкет. Падвядзенне вынікаў завяршылася выдачай сертыфіката кожнаму яго ўдзельніку. 

На сувязі - партнёр з Германіі 

Перад прысутнымі ў анлайн-рэжыме выступіла Эдэльтраўд Шыл, старшыня праўлення дабрачыннай арганізацыі Heim-statt Tschernobyl e.V., для якой Лепель за доўгія гады супрацоўніцтва ўжо стаў блізкім і родным.
- У вас сёння вельмі цікавая праграма, з вялікай колькасцю цікавых і новых адкрыццяў. Вельмі важна беражліва адносіцца да вады, абараняць яе і захоўваць чыстую ваду, бо яна з'яўляецца асновай усяго жыцця. Мы павінны зрабіць усё магчымае, каб захаваць запасы вады не толькі для нас, але і для нашых пакаленняў. Жадаю вам смеласці для новых ідэй і поспехаў у рэалізацыі гэтых пытанняў, - адзначыла Эдэльтраўд па відэасувязі.
Таксама яна падзякавала ўсім арганізатарам важнага мерапрыемства і пажадала паспяховага правядзення канферэнцыі.
Водныя рэсурсы Беларусі
Аб водных рэсурсах Беларусі і экалагічнай якасці паверхневых вод расказала Тамара Макарэвіч, дацэнт кафедры агульнай экалогіі і методыкі выкладання біялогіі Беларускага дзяржаўнага ўніверсітэта.
Пачала свой даклад Тамара Аляксандраўна з агульных звестак аб водных рэсурсах краіны і акцэнтавала ўвагу, што тэрыторыя Беларусі служыць водападзелам для басейнаў Балтыйскага і Чорнага мораў.
Закранула і тэму экалагічнай якасці вады. Прыемна, што 68 працэнтаў паверхневых водных аб'ектаў у Беларусі мае па экалагічным стане статус «добры і вышэй». Алег Лебедзь звярнуў увагу слухачоў на рацыянальнае выкарыстанне водных аб'ектаў. Таксама эксперт расказаў аб сноўных задачах воднай гаспадаркі, водакарыстанні і водаспажыванні. — Лепельшчына, я ўпэўнены, самы экалагічна бяспечны куток Беларусі. Недарэмна сюды прыязджаюць у выхадныя дні і водпускі жыхары з іншых раёнаў і абласцей, каб правесці час на прыродзе. Жамчужынай некранутай прыроды ў нашым раёне з'яўляецца Бярэзінскі біясферны запаведнік, - адзначыў Алег Валер'евіч.
Ён таксама распавёў аб водазаборных свідравінах, станцыях абезжалезвання, экалагічным стане водных аб'ектаў раёна.
Ганна Ліхачова, загадчыца кафедры прамысловай экалогіі Беларускага дзяржаўнага тэхналагічнага ўніверсітэта, распавяла пра ачышчальныя збудаванні сістэм водазабеспячэння і водаадвядзення. Цікавым і карысным было выступленне Крысціяна Шульца, дырэктара/інжынера-праекціроўшчыка, эксперта з Германіі. Ён спыніўся на эфектыўнай ачыстцы сцёкавых вод на месцах і асноўных прынцыпах працы пясчана-жвіровых фільтраў, дзе яны лепш за ўсё дастасавальныя.
Рэкамендацыі па праектаванні, уладкаваннi і эксплуатацыі пясчана-жвіровых фільтраў ачышчальных збудаванняў сцёкавых вод даў дацэнт кафедры «Водазабеспячэнне і водаадвядзенне» Беларускага нацыянальнага тэхнічнага ўніверсітэта Уладзімір Ануфрыеў.
Уладзімір Мікалаевіч адзначыў, што раслінныя ачышчальныя збудаванні - гэта механіка-біялагічныя метады ачысткі сцёкавых вод, заснаваныя на ўзаемадзеянні глебы, мікраарганізмаў і раслін. Ачыстка адбываецца без выкарыстання электрычных кампанентаў. Спікер падрабязна спыніўся на тым, як працуе метад біялагічнай ачысткі, з чаго складаюцца бытавыя сцёкавыя воды, спосабах ачысткі сцёкавых вод і метадах біялагічнай ачысткі сцёкаў.
Падвёў вынікі праекта Юрый Супрыновіч, выканаўчы дырэктар Міжнароднага дабрачыннага грамадскага аб'яднання «ЭкаБудаўнік».
Юрый Лявонцьевіч адзначыў, што арганізатарамі праекта з'яўляюцца дабрачынная арганізацыя «Дома замест Чарнобыля», міжнароднае дабрачыннае грамадскае аб'яднанне «ЭкаБудаўнік». Партнёры па праекце - Лепельскі райвыканкам, УА «Лепельскі дзяржаўны аграрна-тэхнічны каледж» і УА «Старалепельская дзяржаўная агульнаадукацыйная базавая школа». Мэта праекта - укараненне інавацыйных і ўстойлівых падыходаў у сельскай мясцовасці з выкарыстаннем нямецкага і беларускага вопыту і ўмацаванне прафесійных кампетэнцый беларускіх партнёраў у галіне водазабеспячэння, аховы водных рэсурсаў, праектавання і будаўніцтва ачышчальных збудаванняў. Мэтавая група - навучэнцы і студэнты тэхнічных навучальных устаноў, а таксама эксперты і спецыялісты воднага сектара.
У рамках праекта праведзена 11 навучальных семінараў і навуковых канферэнцый для студэнтаў, навучэнцаў, школьнікаў і спецыялістаў на тэму «Чыстая вада і санітарныя збудаванні ў перыяд змены клімату», 9 экскурсій у раён возера Нарач (трысняговая вытворчасць у аг. Занарач), а таксама прэзентацыя праекта і мерапрыемства да Сусветнага дня водных рэсурсаў.
Акрамя гэтага, была арганізавана экскурсія ў Германію ў кастрычніку гэтага года, удзельнікі якой наведалі аб'екты па ачыстцы сцёкавых вод і водападрыхтоўцы, азнаёміліся з іх працай і архітэктурна-канструкцыйнымі асаблівасцямі, пытаннямі энергазберажэння і энергазабеспячэння.
Як адзначылі эксперты і самі навучэнцы ВНУ і каледжа, канферэнцыя была насычанай і вельмі пазнавальнай, спрыяе ўдасканаленню прафесійных навыкаў і фарміраванню здаровага маладзёжнага асяроддзя.