31 кастрычніка праводзілі на заслужаны адпачынак начальніка Лепельскага ўчастка паштовай сувязі Полацкага рэгіянальнага вузла паштовай сувязі Віцебскага філіяла РУП «Белпошта» Пятра Жарнасека.

Словы падзякі за шматгадовую працу і прафесіяналізм выказалі дырэктар Віцебскага філіяла РУП «Белпошта» Сяргей Максак, начальнік Полацкага РВПС Вольга Закрэўская, а таксама калектыў СПС Лепель і першасная прафсаюзная арганізацыя. Выхад на пенсію, безумоўна, важная падзея ў лёсе чалавека. Для кагосці яна сумная, для кагосці радасная, але заўсёды асаблівая, таму што сімвалізуе чарговы крок у новы жыццёвы этап. Пётр Васільевіч глядзіць на гэты этап з пазітывам і вялізнымі планамі. Апроч працоўнай дзейнасці мужчына заўсёды шмат увагі надаваў сваёй хаце і ўчастку, які імкнецца зрабіць сапраўдным райскім кутком. У гутарцы адзначаў, што з-за працы часам не хапала часу на добраўпарадкаванне тэрыторыі, догляд за садам. Цяпер паспрабуе ўсё нагнаць. Лічу, што жыццё на пенсіі выдатнае, тым больш, што мне ніколі не бывае сумна. Я нават не ведаю, што гэта такое... Як можна сумаваць, калі навокал столькі цікавага і столькі трэба паспець зрабіць! Хто такі начальнік участку паштовай сувязі? Гэта чалавек, які задае тон працы ўсяму калектыву. Кампетэнтнасць супрацоўнікаў, якасць выкананай працы і абслугоўвання кліентаў, даходы аддзялення, атмасфера ў калектыве і многае іншае - усё гэта трымаў на кантролі Пётр Васільевіч на працягу многіх гадоў. Трэба сказаць, што зона адказнасці кіраўніка вялікая, але і кіраўнічы вопыт за плячыма Пятра Васільевіча таксама не малы. Таму сур'ёзных складанасцяў не ўзнікала падчас працы.
-- Я ўдзячны ўсім працаўнікам пошты за адданасць прафесіі, за тое, што ўкладваюць душу ў сваю працу! І, вядома, жадаю, каб ім працавалася паспяхова і творча, дабрабыту, рэалізацыі планаў і запаветных жаданняў, - на сустрэчы з кіраўніцтвам і калектывам сказаў Пётр Васільевіч.
Супрацоўнікі аб ім адклікаюцца з цеплынёй і кажуць, што ў любой сітуацыі, нават складанай, ён застаецца добразычлівым з калегамі і кліентамі, валодае тонкімі камунікатыўнымі навыкамі, заўсёды падказвае, як паступіць, каб пазбегнуць канфлікту.
Наталля Храпавіцкая.

Наталля Храпавіцкая. Газета «Лепельскі край»