У сучасным хутка развіваючымся свеце чалавек павінен валодаць ведамі і быць кампетэнтным у галіне фінансаў, сачыць за дынамікай развіцця дадзенай сферы. З гэтай мэтай у цэнтральнай раённай бібліятэцы была праведзена пазнавальная гадзіна з навучэнцамі Лепельскага аграрна-тэхнічнага каледжа на тэму «Фінансавая граматнасць - залог поспеху».

Падрыхтавалі і правялі мерапрыемства Людміла Раманоўская - бібліятэкар аддзела абслугоўвання і інфармацыі, а ў мінулым спецыяліст ААТ ААБ «Беларусбанк», і Ганна Васілеўская - загадчык гэтага аддзела.

У гісторыі чалавецтва ёсць шмат выпадкаў, калі жабракі станавіліся мільянерамі і, наадварот, тыя, каму раптоўна на галаву падала багацце, прымудраліся страціць усё за кароткі тэрмін. На сітуацыю ў другім выпадку, адназначна, уплывала неразуменне таго, як працуюць грошы, як іх зарабляць і кіраваць імі. Фінансавая граматнасць дапамагае чалавеку правільна распараджацца грашовымі сродкамі і дае больш шанцаў жыць у дастатку. Пра гэта і не толькі даведаліся хлопцы з расповеду Людмілы Раманоўскай.

У працэсе зносін увага прысутных была акцэнтавана на найбольш папулярных спосабах і відах сучаснага махлярства.

Ганна Васілеўская правяла практычныя заняткі ў выглядзе тэстаў па тэмах: «Асабістыя фінансы», «Наяўныя грошы», «Зберажэнні» і інш.

Таксама хлопцы азнаёміліся са зместам матэрыялаў інфармацыйнай зоны, дзе былі прадстаўлены навучальныя брашуры і флаеры на тэмы: «Што рабіць, калі з карты скралі грошы», «Як зберагчы свае гаджэты ад вірусаў», «Як абараніцца ад фінансавых ашуканцаў» і іншыя.