Дні Віцебскай вобласці стартавалі 2 лютага ў павільёне "Рэспубліка Беларусь" на ВДНГ у Маскве, перадае карэспандэнт БЕЛТА.

Эстафету прэзентацый абласцей Беларусі на галоўнай расійскай выстаўцы Віцебшчына прыняла ў Брэсцкай вобласці, якая дэманстравала тут свой патэнцыял практычна ўвесь студзень. На працягу паўгода свае экспазіцыі на ВДНГ у Маскве пакажуць усе вобласці Беларусі і горад Мінск.

"У нашай канцэпцыі прадстаўлена практычна ўся гісторыя станаўлення і развіцця як Віцебскай вобласці, так і ў цэлым беларускай дзяржаўнасці на полацкіх землях. Гэта і старажытныя рамёствы, строі віцебскага шляхціца, гісторыя першага беларускага трамвая. Асобны стэнд прысвечаны партызанскаму руху на Віцебшчыне ў гады Вялікай Айчыннай вайны, у тым ліку жыццю і подзвігу аднаго з найбольш вядомых партызан краіны Міная Піліпавіча Шмырова (Бацькі Міная). Мы прадставілі экспазіцыю, якая расказвае пра аднаўленне прамысловасці ў пасляваенны час: першая цэгла, якую рабілі ў Віцебскай вобласці, прадукцыю фабрык лёгкай прамысловасці, якія выпускалі прадукцыю са знакам якасці СССР", - расказала карэспандэнту БЕЛТА намеснік старшыні Віцебскага аблвыканкама Анжаліка Нікіціна.

Сучасная прамысловасць Віцебскай вобласці прадстаўлена ў гандлёвых павільёнах: тут і беларускі лён, і абутак, і прадукцыя прадпрыемстваў харчовай прамысловасці. Усе вырабы суправаджаюцца спецыяльнымі QR-кодамі, якія даюць магчымасць даведацца ў цэлым аб прадпрыемстве і ўсёй прадукцыі, што выпускаецца на ім.

Пацвярджаючы сваё званне культурнай сталіцы Беларусі, Віцебская вобласць зрабіла акцэнт у экспазіцыі менавіта на сферы культуры. "Мы прывезлі знакамітую віцебскую школу мастакоў - пачынаючы ад лістовак і плакатаў часоў яе станаўлення і заканчваючы карцінамі сучасных мастакоў. Прычым мастацкая экспазіцыя пастаянна будзе відазмяняцца", - паабяцала Анжаліка Нікіціна.

Вядома ж, асобнае месца нададзена "Славянскаму базару ў Віцебску": пра яго ўсім наведвальнікам нагадвае копія аркі Летняга амфітэатра, якая ўпрыгожвае сцэну павільёна, а таксама фатаграфіі, якія расказваюць пра самыя яркія фестывальныя падзеі. А 15 лютага тут пройдзе канцэрт, падрыхтаваны дырэкцыяй "Славянскага базару ў Віцебску", з удзелам артыстаў, якія ў розныя гады выходзілі на сцэну віцебскага форуму мастацтваў.

Зрэшты, сучасная культура Віцебшчыны - гэта не толькі "Славянскі базар". У прыватнасці, арганізатары прадставяць шэраг іншых міжнародных фестываляў і конкурсаў, у прыватнасці "Вішнёвы фестываль" у Глыбокім, а таксама віцебскія рамёствы.

Падрыхтавала Віцебская вобласць і сюрпрызы для наведвальнікаў ВДНГ. "Будуць майстар-класы харчовых прадпрыемстваў, у тым ліку па размалёўцы пернікаў, розныя розыгрышы, дэгустацыі, бяспройгрышныя латарэі", - паведаміла намеснік старшыні аблвыканкама.

"Кожны наведвальнік зможа вывучыць культуру і гісторыю Віцебскай вобласці, даведацца пра сучаснае жыццё, выйграць які-небудзь памятны сувенір. Думаю, што ўсе госці, якія нас наведаюць, затым абавязкова захочуць прыехаць у Віцебскую вобласць", - дадала Анжаліка Нікіціна.

БелТА